بۆچی ١٧ شوبات خەڵکی زەحمەتکێش قوربانی دا و گۆڕان و ئیسلامیەکان پۆستیان پێ وەرگرت؟ 

چاوپێکەوتنی ئاسۆ کەمال؛ یەکێک لە قسەکەرانی مەیدانی ئازادی لەگەڵ ئاراس ڕەشید لە بڵاوکراوەی بۆپێشەوە
بۆپێشەوە: سەرەتا ٧١ شوبات، لەسەربانگەوازی ژمارەیەک هەڵسوراوی کرێکاری و
جەماوەری دەستی پێکرد، بەڵام پاشان حزب و لایەنە سیاسیەکان کۆنتڕۆڵیان کرد، چۆن
توانیان دەستی بەسەردا بگرن؟
ئاسۆکمال: ١٧ شوبات بەرئەنجامی دوو فاکتەربوو. یەکەمیان؛ئەو ناڕەزایەتیانەی لە ٢٠٠٧ەوە خەڵکی کرێکاروفەرمانبەر و لاوان و ئازادیخوازانی کوردستان بۆ ئاو و کارەبا و سوتەمەنی و دژی گەندەڵی و لە پێناو ئازادیە سیاسیەکان و ئازادی ڕادەربڕین و ڕۆژنامەگەری هەبوو. 
دووەمیان:شۆڕشە سیاسیەکانی تونس و میسر و خۆرهەڵاتی ناوەڕاست بوو.
چالاکوانە ناڕەزایتیە جەماوەریەکان دەستپێشکەریان لە هەڵگیرسانی کۆبونەوەی سەرای سلێمانیدا کردو خەڵکی ناڕازیش لە دەسەڵاتی یەکێتی وپارتی دەستیان کرد بە خۆپیشاندان دژی بنکەکانی ئەم حزبانە و بەتایبەت پارتی.
بەڵام مەیدانی ململانێی سیاسی تەنیا بە چونە سەر شەقام کۆتایی نایەت ، لە پرۆسەی زیاتر لە مانگ و نیوێک و لە کۆتاییدا ئەو هێزە سیاسیانەی ڕیکخستن و موبادەرە و جەماوەریان هەیە دەتوانن کاریگەری لەسەر ئاراستە و ئایندەی ئەو ناڕەزایەتیانە دابنێن و بەپێی دۆخی ناوچەکە و هاوسەنگی ناوخۆ ئاکامەکەی دەبڕێتەوە.
زاڵ بونی حزبە بورژوازیەکانی گۆڕان و ئیسلامیەکان، ئۆتۆماتیکی نەبو ، بەڵکو بەرئەنجامی دوو فاکتەربوو. یەکەمیان ئەم حزبانە و بەتایبەت گۆڕان لە پرۆسەی چەند ساڵێکدا خۆی کردە نوێنەری ئەو ناڕەزایتیەی خەلک بەرامبەر بەدەسەڵات هەیبوو.
دووەم بەرەی کرێکار و چەپ و حزبی ئێمە، حزبی کۆمۆنیستی کرێکاری کوردستان، نەمانتوانی نوێنەرایەتی ئەو خەڵکە ناڕازیە بکەین و ڕیکخستن و موبادەرە و سیاسەتی ئەو پێشڕەوی کردەمان نەکردبوە بەرنامەی کارمان و هەر لە قاڵبی گروپی ڕاگەیاندندا مابوینەوە. کاتێكیش شۆڕشەکانی ناوچەکە قوڵپی دەدا سەرەڕای کار کەوتنەکار و دەستپێشکەری لە خستنەڕێی خۆپیشاندانەکان و بەردەوام بوونی بەشداری چالاکانەمان لە مەیدانی ئازادی و ئەنجومەنی ئازادیدا ، بەڵام تواناکانمان بەرتەسک بوو لەوەی بتوانین ببینە پێشڕەوی ئەو ناڕەزایەتیانە و دەرهێنانی لەدەست سازشکاری حزبەکانی گۆڕان و ئیسلامیەکان.
ئێمە وەک هاوڕییانی حزب کە هەڵسوڕاوی ئەنجومەنی ئازادی بوین فشارمان دانا کە ئەنجومەنەکە دژ بە هەڵوێستی سازشکارانەی گۆڕان و ئیسلامیەکان بێ تا ساتوسەودا بە داخوازی خۆپیشاندەرانەوە نەکرێ ، بەڵام کەسی یەکەمی ئەنجومەنەکە کە د.فاروق ڕەفیق بوو دژی ئەم هەڵوێستەی ئێمەبوو. هەروەها هەوڵماندا هەموو کۆمۆنیست و چەپەکانی ناو ئەنجومەنەکە و ناو ناڕەزایتیەکان لەدەوری پلاتفۆرمێک کۆبکەینەوە بەڵام ئەم کارەش سەرکەوتونەبوو بەهۆی جدی نەبون و سیاسی نەبونی خودی حزبی ئێمە و چەپەکانی ترەوە لە دروستکردنی هێزێکی سیاسی چەپی گەورەوکاریگەردا و هەربۆیە پلاتفۆرمەکە وەک مەرەکەبی سەرکاغەز مایەوە.
هەربۆیە بەداخەوە ئاکامی خۆپیشاندانەکان سەرەڕای ڕاوەستاوی و گیانبازی و شۆڕشگێڕی خەڵکی ناڕازی بەڵام شکستی خوارد لەگەیشتن بە خواستی گۆڕینی دەسەڵات و لەلایەن هێزی چەکداری یەکێتیەوە سەرکوتکرا. بێگومان ئۆپۆزسیۆنی گۆڕان و ئیسلامیەکان براوەبون لەوەی توانیان خەڵک فریوبدەن کە پاکێجەکانی ئەوان دەسەڵات دەگۆڕێ و بەڵام وەک بینیمان بەرهەمی خۆپیشاندانەکانی ١٧ شوبات و کۆکردنەوەی ئەم هێزی جەماوەری ناڕازیان کردە ئامڕازێ بۆ بونە شەریکی دەسەڵات و لەم ڕێگایەوە توانیان پلە و پۆست وەرگرن.
دوای شوراکانی ١٩٩١ ئەمە دوەم تاقیکردنەوەی سیاسی ئێمەبوو کە دەبێ دەرسی لێوەرگرین و بەدوای ناسین و پڕکردنەوەی کەموکوڕیە سیاسی و پراتیکیەکانماندا بچین و بزانین لەگەڵ دوبارە دەرکەوتنەوەی خۆپیشاندان و مانگرتن و ڕاپەڕینە سیاسیەکانی ئایندەدا پێویستە چی بکەین؟ مانگرتنەکانی چەند ساڵی ڕابردوو و سەراسەری بونەوەی خواستە ئابوری و سیاسیەکان و بەبنبەست گەیشتنی ئۆپۆزسیۆنی بورژوازی گۆڕان و ئیسلامیەکان، لەوەی بتوانن هیچ لە سیستەمی دوو حزبی میلیشیایی بگۆڕن ، پیویستی هاتنەمەیدانی هێزی ڕێکخراو و یەکگرتووی کۆمۆنیستەکان و کرێکاران و ئازادیخوازانی کردۆتە مەرجی سەرکەوتنی ئەو خەبات و ناڕەزایەتیە چینایەتیەی کرێکاران و فەرمانبەران و لاوان و ژنان لە کۆمەڵگەی کوردستاندا بۆ گۆڕینی سیستەمی میلیشیایی و مافیایی بورژوازی کورد هەیانە.