گفتوگۆ

١٠ ساڵ بەسەر ١٧ شوباتدا

ئەم خۆپیشاندان و ناڕەزایەتیانەی کوردستان لە ٢٠٠٧ و ٢٠١١و ٢٠١٦ و ٢٠١٩ و ٢٠٢٠دا زنجیرەیەکی بەردەوام لە خەباتی چینایەتین لە نێوان خەڵکی هەژار دژ بە سیستمێکی سەرمایەداری کە لە کوردستاندا پرۆسەیەکی توندوتیژی کەڵەکەی سەرمایەی دەستپێکردوە.
بەشێک لە چاوپێکەوتنێک لەگەڵ بڵاوکراوەی ئۆکتۆبەر سەبارەت بە ١٧ شوبات..سوپاس بۆ هاوڕێم محسن کەریم کە گفتوگۆکەی سازکردوە.

ئۆکتۆبەر: ئێوە وەکو یەکێك لە کەسە دیارەکانی ناو خۆپیشاندانەکانی ١٧ی شوبات، هۆکارەکانی سەرهەڵدانی ئەو خرۆشانە جەماوەریە بۆچی دەگەڕێننەوە؟

ئاسۆکمال: دوای ٢٠ ساڵ لەژێر سایەی دەسەڵاتی یەکێتی و پارتیدا خەڵکی کرێکار و زەحمەتکێش و گەنجان و ئازادیخوازان دەیانبینی کە لە ٨ ساڵی دای ڕوخانی بەعسدا ، لەلایەک هیچ مەترسیەکی دەرەکیان لەسەر نەماوە و لەلایەکی تریشەوە دەسەڵاتدارانیش هەرچی داهات و سەرمایەیەکی کوردستان و بودجەی عێراقە هەڵیدەلوشن و بێ ئەندازە دەوڵەمەندبوون، بەڵام ئەم خەڵکە چەندین ساڵە ناڕەزایەتی بۆ نەبونی خزمەتگوزاری کارەبا و ئاو و سوتەمەنی دەردەبڕن و دەسەڵات هیچ وەڵامێکیان ناداتەوە.

لەم کاتەدا شۆڕشی گەنجان و خەڵکی کرێکار و هەژار و ئازادیخوازی میسر و تونس زەمین لەرزەیەکی سیاسی لە ناوچەی ڕۆژهەڵاتی ناوەڕاستدا دروستکرد و لە زۆربەی وڵاتان و لەوانەش لە کوردستان کە خەڵکی هەژار و ئازادیخواز هەمان دۆخیان هەیە، ئەم شەپۆلە گرتیەوە.

 خرۆشانی سیاسی جەماوەری ناڕازی و ئازادیخوازی کوردستان کۆتایی مێژوویەک لە بێدەنگی سیاسی بوو
بەرامبەر دەسەڵاتی سیاسی حزبە ناسیونالیستە دەسەڵاتدارەکانی کوردستان. لەدوای ڕاپەڕینی بەهاری ١٩٩١ ئەمە یەکەم جار بوو کە خەڵکی کوردستان ڕوبەڕووی دەسەڵات و سیستەمی سیاسی ڕاوەستێ و داوای ڕووخانی بکا.

هەربۆیە ئەمە هەم ئیلهامێک بوو کە خەڵکی کوردستان لە شۆڕشی گەنجان و خەڵکی کرێکار و هەژار و ئازادیخوازی میسر و تونس وەری گرت و بۆ ماوەی ٦٢ ڕۆژ بە خۆپیشاندان و ناڕەزایەتی دەربڕین لەمەیداندا مایەوە.  هاوکات ئەمە درێژەی ئەو ناڕەزایەتیە جەماوەریانە بوو کە لە ٢٠٠٧ ەوە لە دژی نەبونی خزمەتگوزاری کارەبا و ئاو و سوتەمەنی و دژ بە گەندەڵی و پێشێلکردنی ئازادیە سیاسیەکان درێژەی هەبوو.

ئەم خۆپیشاندان و ناڕەزایەتیانەی لە کوردستان لە دوای ڕوخانی بەعسەوە و بەتایبەت لە ٢٠٠٧ و ٢٠١١و ٢٠١٦ و ٢٠١٩ و کۆتا جاریش لە دیسەمبەری ٢٠٢٠دا ڕویانداوە زنجیرەیەکی بەردەوام لە کێشمەکێش و ململانێی چینایەتین لە نێوان خەڵکی کرێکار و کارمەند و مامۆستا و خانەنشین و گەنج و ژن و ئازادیخواز و بێکاردا دژ بە سیستمێکی سەرمایەداری کە لە کوردستاندا پرۆسەیەکی خێرا و توندوتیژی کەڵەکەی سەرمایەی دەستپێکردوە. ئەم زنجیرە بەردەوامە لە دەرکەوتنی خێرای خۆپیشاندانێکی توند و تیژی هێرش بەرانەدا یاخود مانگرتنێکی هێمنی چەند مانگیدا خۆیان نیشان دەدەن پێکەوە ئەم ڕەوتە لە خەباتێکی چینایەتی نیشان دەدەن کە بەرەنگاری خەڵکی کرێکار و هەژارە بەو هێرشە هەمەلایەنەی دەکرێتە سەر ئاستی گوزەران و موچە و ئازادیەکان و هەموو لایەنەکانی ژیانی ئەم خەڵکە تاکو سەرمایەی دەسەڵاتداران بتوانێ بەبێ ڕێگری گەشەبکا و قورسایی و زیانی قەیرانە ئابوری و دابەزینی نرخی نەوت و شەڕی بودجە و هەلئاوسانی پارە و بێکاری وهەموو کێشەکانی تر بەسەر خەڵکی کەم دەرامەتدا بسەپێنرێ.

ئۆکتۆبەر: خرۆشانی جەماوەری ١٧ ی شوبات نەیتوانی بە ئامانجەکانی خۆی بگات، هۆکاری ئەوە بۆچی دەگەڕێننەوە؟ کەموکوڕیەکان چی بوون. ئەو دەرس و ئەزمونانە چین کە دەبێ جەماوەر لەو بزوتنەوەیە وەربگرێت، بەتایبەتی کە خۆپیشاندان و خرۆشانی جەماوەری ناوبەناو دەست پێدەکاتەوە، بەڵام هێشتا نەیتوانیوە کەموکوڕیەکانی پێشتری تێپەڕێنێ؟

ئاسۆکمال: ئەم خۆپیشاندانانە زیاتر بەرگێکی سیاسی هەبوو. خواستی دژی گەندەڵی و نەبوونی خزمەتگوزاریش هەر لە ژێر ئەم چەترەی دژی دەسەڵاتی سیاسی و میلیشیایی یەکێتی و پارتیدا بوو.  بەتایبەت کە کرێکاران و کارمەندان بەشداری سەربەخۆیان نەبوو و هیچ مانگرتن و شێوازێکی تری خۆپیشاندان لە ناوەندەکانی کاردا نەبوو، تاکو بتوانێ فشارێکی ئابوری و جەماوەری و ئیداری لەسەر دەسەڵات دابنێ. ئاستی وشیاری سیاسی و ڕێکخراوی جەماوەری ناڕازی بەرامبەر بە دەسەڵاتی یەکێتی و پارتی هێشتا خۆبەخۆیی بوو و لە داواکاریەکی دیاریکراوی سیاسیدا فۆرمۆڵە نەبوو بوو . هاوکاتیش دروشمێکی پراتیکی ڕۆشن نەبوو کە ئاستی داواکاریەکان و چۆنیەتی جێبەجێکردنیان دیاری بکا و هەربۆیە لە خواستێکی گشتی “ڕوخانی دەسەڵاتی گەندەڵ”دا مایەوە .

هاوکات ڕێکخەرانی داواکاریەکانی ناڕەزایتیەکانی پێشوو بۆ خزمەتگوزاری و ئازادیە سیاسیەکان هیچ ڕیکخراوەیەکی سەندیکایی و سیاسیان نەبوو. ئەو دەستەیەی سەرپەرشتی ناڕەزایەتیەکانی دەکرد تێکەڵاوێک بوو لە گۆڕان و ئیسلامیەکان و کۆمۆنیستەکان. ئەم دەستەیە پەیوەندیەکی توندوتۆڵ و ڕیکخراوی نەبوو لەگەڵ جەماوەری ناڕازی و گەنجان و خوێندکاراندا. گۆڕان لە ڕێگەی ڕیکخستنەکانی خۆیەوە دەوری سەرەکی هەبوو و لەم دەستەیەشدا باڵادەست بوون و دەستەکە خۆی بە خاوەنی بڕیار نەدەزانی و لە بەرامبەر دەسەڵاتدا وەک هێزێک دەرنەکەوت و مەیدانی بۆ ئۆپۆزسیۆنی بورژوازی چۆڵ کردبوو و تەنانەت دژ بە دەنگ هەڵبڕینی ئێمەش دژ بە ساتوسەودای گۆڕان و ئیسلامیەکان لە دەسەڵاتدا بوو.

هەربۆیە ئۆپۆزسیۆنی گۆڕان و ئیسلامیەکان هەژمونیان بەسەر ئەم ناڕەزایەتیانەدا پەیداکرد و لە ڕێگەی لە قاڵبدانی خواستەکان بۆ پاکێجی چاکسازی دەسەڵات توانیان سوود لە ناڕەزایەتیەکان ببینن بۆ وەرگرتنی ئیمتیازات لە دەسەڵات.

هەربۆیە ئەم ناڕەزایەتیە جەماوەریانە کە زۆربەی گەنجان بوون نەیتوانی بزوتنەوەیەکی سیاسی بخاتە ڕێگا کە وەک شۆڕشەکانی میسر و تونس گۆڕانکاری سیاسی دروست بکا. لەم هاوسەنگی هێزەدا لە بەرانبەرکێ لەگەڵ دەسەڵاتدا بە سەرکوت یەکێتی توانی کۆتایی بە خۆپیشاندانەکان بهێنێ، وە بە سازشی ئۆپۆزسیۆنی بورژوازیش لەگەڵ دەسەڵاتدا ناڕەزایەتیەکان خامۆش بوو.

دەرس وەرگرتن لەم ئەزمونە گرنگە. هەم بۆ ئێمە وەک کۆمۆنیستەکان و هەم بۆ جەماوەری کرێکار و زەحمەتکێش و گەنجان و ژنانی ناڕازی و خەڵکی ئازادیخواز.

بۆ ئەوەی بتوانین ناڕەزایەتی و خۆپیشاندان و خرۆشانە جەماوەریەکان سەرکەوتوبن پێویستە ئاستی توانایی و ڕیکخراوی خۆمان بەرامبەر بەم دەسەڵاتە بزانین تا بزانین لە هەر هەنگاو و دۆخێکدا دەتوانین چۆن بەرەبەرە قەرزەکان لەم حکومەتە گەندەڵە سەرمایەدارانی کورد بسەنینەوە. دروشمی ڕوخان هەمیشە عەسایەکی سحری نیە و بە بەرزکردنەوەی ئەم دەسەڵاتە بتوانین بڕوخێنین. هەربۆیە دەبێ بزانین کە بەبێ بردنە سەری ئاستی ئامادەیی ڕیکخراوەییمان لە هەر کارگە و فەرمانگە و شار و شارۆچکەیەکدا بنکە و بارەگا حزبی و سەربازیەکان دەتوانن هێزەکانمان سەرکوت بکەن. هەربۆیە پێویستی بە ناسینی قۆناغەکانی خۆئامادەکردن و ڕوبەڕوو بونەوەیە تا بتوانین هەنگاوی سەرکەوتوبنێین. ئەم کارە پێویستی بە دەست دانە پێکهێنانی ڕیکخراوە جەماوەریەکانە کە لە هەموو شوێنێک بەرامبەر بە دەسەڵاتداران بتوانن هێزی ناڕازی خەڵک ڕیکخراو بکەن و فێری چۆنیەتی خەباتی درێژخایەنی بکەن. ئەمە دەبێ ستراتیژی ئەم دەورەیەی ناڕەزایەتیەکان بێت کە تەجروبەی ئەم چەند ساڵە لە پێکهێنانی دەستەی ناڕەزایەتیەکان لە کاتی ناڕەزایەتیەکاندا پێویستە بگۆڕین بۆ ڕیکخراوی هەمیشەیی و کاری بەردەوام بکەین بۆ جێگرتنەوەیان بە سەندیکاکانی سەر بەدەسەڵات.

ئێمە ئەگەر لە ١٧ شوباتدا ئەم ڕیکخراوانەمان هەبوایە ئەو کات وەک خەڵکی کرێکار و زەحمەتکێشی تونس و میسر دەمانتوانی وەک هێزێکی دیاری مەیدانی سیاسی ڕوبەڕووی دەسەڵات ببینەوە و ئۆپۆزسیۆنی بورژوازی نەبێتە تەنیا هێزێک کە پڕۆژەی چاکسازی خۆی لەگەڵ دەسەڵاتدا بکاتە فاتیحای خۆپیشاندانەکان.

وەک بزوتنەوەی کۆمۆنیستیش دەرس وەرگرتن لەم ئەزمونە پێویستە ناسینی کەموکوڕیەکانمان و بەدیلێک بێت بۆ ئەو لاوازیەی کە نەمانتوانیوە ببینە هێزێکی سیاسی ڕیکخراو کە بتوانێ ڕێگە لە ئۆپۆزسیۆنی بورژوازی بگرێ کە ئەم خەبات و ناڕەزایەتیانە بەلاڕیدا ببەن. تەجروبەی ١٧شوباتی ٢٠١١،سەرەڕای دەخاڵەتی هەڵسوڕاوانی کۆمۆنیست لەم ڕاپەڕینە جەماوەریەدا لەدەوری ئەم بزوتنەوە جەماوەریە کۆبوینەوە و لەم پێناوەشدا “پلاتفۆرمی چەپ و کۆمۆنیستەکان”مان دروستکرد، بەڵام ئەم هەنگاوە نەبوە سیاسەتێک کە حزب و گروپە کۆمۆنیستیەکان بتوانێ بکاتە هێزێکی سیاسی کە بەکردەوە لە خۆپیشاندانەکاندا کاریگەری دابنێ و دەخاڵەتێکی کاریگەر لە “ئەنجومەنی سەرای ئازادی”یدا پێ بکا و هاوکات بەشێوەیەکی پراتیکانە سود لەم ناڕەزایەتیانە ببینێ بۆ چونە ناو جەماوەری ناڕازی و پەیوەندیکردن بە هەڵسوراوانی کریكار و خوێندکار و لاوان و ژنانەوە و کاری ناو گەرەک و ناوەندەکان دەست پێ بکا و چیتر لە ئۆفیسەوە پێیمان وانەبێ کە نوێنەری چینی کرێکار و زەحمەتکێشین بەڵام لە ناڕەزایتیەکانیاندا لە پەراوێزداین و لە دنیای واقعی ململانێ و شەڕی سەرشەقامدا گروپێکی دابڕاو لە جەماوەرن. وە کاتێک کە بزوتنەوە جەماوەریەکە شکست دەخوا، ئەو کات لە لێکدانەوەی “١٧ شوبات”دا پاساوی شکستی کرێکاران و خۆپیشاندەران بەوە بدەینەوە کە ئەم جەماوەرە دوای خۆشباوەڕی گۆڕان و ئیسلامیەکان و ناسیونالیزمی کورد کەوتن.

 لە کاتێکدا ١٧ شوبات یەکەم تەجروبەی سیاسی کرێکاران و لاوان و خەڵکی ئازادیخوازی کوردستانە دژی ناسیونالیزمی کورد و ڕاپەڕینێک بوو دژی خۆشباوەری دەیەیەک بە ناسیونالیزمی دەسەڵاتدار لە کوردستاندا. لەوکاتەدا کۆمۆنیستەکان دەبێ بە شوێن ئەو فرسەتەدا بگەڕێن کە پەیوەندی خۆیان بە جەماوەرە بنیات بنێن و ببێتە ئەو هێزەی کە ئەم ناڕەزایەتیانە بەرەو هەنگاوی سەرکەوتوانەتر بەرێ و ڕیگە بگرێ لەوەی ببێتە قوربانی ساتوسەودا و خۆشباوەری بە گۆڕان و ئیسلامیەکان. ئەمە مەیدانی ململانێی سیاسی بوو کە کۆمۆنیستەکان بە پێی دیدگا و پراتیکی بەرتەسک و سێکتاریستی خۆی نەیتوانی سوود لەم ڕاپەڕینە وەرگرێ و لانی کەم لە دابڕاوی و پاسیڤیزم خۆی ڕزگاربکا.

 ئەم تەجروبانە نیشانمان دەدا کە بون بە هێز و هێزی یەکەم و پەیداکردنی هەژمونی سیاسی و دەسەڵات و بەگشتی سیاسەت و ستراتیژ و سۆشیالیزم بریتی نیە لە پرۆژە و پلاتفۆرمی لێکدانەوەی شکستەکان، بەڵکو چۆنیەتی کۆکردنەوەی هێزی چینایەتی و کۆمەلآیەتیە بۆ ئەنجامدانی ئەو پڕۆژانەیە لە نێو جەرگەی خەباتی ڕۆژانە و ڕاپەڕینی جەماوەری کرێکاران ولاوان و ژنان و خەڵکی زەحمەتکێشدا.  پێمان دەڵی پڕۆژە و سیاسەتی سەرکاغەز ناتوانێ هیچ لەواقیع بگۆڕێ، ئەگەر هیزێکی کۆمەڵایەتی و جەماوەری ئەم پڕۆژە و سیاسەت و ستراتیژانە بەکردەوە پیادەنەکا. ئەمە خاڵی تێپەڕینە لە گروپێکی تەبلیغاتی ڕۆشنبیرانی کۆمۆنیستەوە بۆ حزبێکی کرێکاری کە دەتوانێ سیاسەت بکا و خۆی لە پاسیڤیزمی مانەوە لە ئۆپۆزسیۆنێکی ڕادیکاڵ ڕزگاربکا و ببێتە هێزێکی سیاسی و دەخاڵەتگەر و ڕادیکاڵی جەماوەری کاریگەر. ئەمە ستراتیژی سیاسی کۆمۆنیستەکانە کە حزبێکی جەماوەری کرێکاری دروست بکەن لە هەموو گروپ و دەستە خەباتکارەکانی نێو ناڕەزایەتیەکانی کرێکاران و فەرمانبەران و بەرنامەی ئەم ناڕەزایەتیە سیاسی و جەماوەریانە بکەنە بنەمای ڕیکخراوکردنی ئەو هێزە جەماوەریە. بەبێ دروستبونی ئەم ڕیزە سەربەخۆ چینایەتیانەی کرێکاران لە حزب و ڕیکخراوەی جەماوەری ناتوانین دەرس لەو شکستانە وەرگرین کە لە خەبات و ناڕەزایتیە بەردەوامەکانی دەیە و نیوی ڕابردوودا لە کوردستان ڕویانداوە. بەبێ جێبەجێکردنی ئەم ستراتیژیە ڕێکخراوەییە بە داخەوە بزوتنەوە جەماوەری و سیاسیەکەمان لە ئاست سەرەتایی پەرژوبڵاوی و ناڕیکخراوی خۆیدا دەمێنێتەوە.

ئۆکتۆبەر: ناڕەزایەتیەکانی جەماوەر ئێستا رووی لە کۆتایی هێنانە بەدەسەڵات، ئەمە هەنگاوێكی سیاسی پێشکەوتوترە بە بەراورد بە خرۆشانەکانی ١٧ شوبات. بگرە جەماوەر ئەو هێزانەشی تێپەڕاندوە کە ئەوکات جلەوی خۆپیشاندانەکانیان گرتبووە دەست. ئایندەی خەباتی جەماوەر دژی دەسەڵات بەڕای ئێوە بەندە بە چ فاکتۆرێکی سیاسی و جەماوەریەوە؟ جێگاوڕێگاو نەخشی ئەحزابی سیاسی و بەدیلی سیاسی لەم فاکتۆرانەدا چی دەبێت؟

ئاسۆکمال: ڕاستە ئەم ناڕەزایەتیانە لەگەڵ خۆیدا وشیاری و تەجروبەی کرێکاران و فەرمانبەران و گەنجان و خەلکی ناڕازی دەباتە ئاستێکی باڵاتر و بە دروشمەکانی “نا بۆ دەسەڵاتی ستەمکار، نا بۆ پەرلەمانی کارتۆنی ، نا بۆ ئۆپۆزسیۆنی ساختە” و سوتاندنی بارەگای حزبە دەسەڵاتدار و کۆنە دەسەڵاتدارەکانیشەوە دیارە. یاخود دروشمی “کۆتایی هێنان بە دەسەڵات” ناتوانێ ئەمانە پێوەری ئامادەیی بۆ کۆتایی هێنان بە دەسەڵات بن. شکست هێنانی ڕیفۆرمی دەسەڵات لە لایەن ئۆپۆزسیۆنی بورژوازیەوە یەکسان نیە بە ئامادەیی بۆ کۆتایی هێنانی شۆڕشگێڕانە بەم دەسەڵاتەی سەرمایەداری لە کوردستان لە لایەن خەلکی کرێکار و زەحمەتکێش و لاوانەوە. ئەم ناڕەزایەتیانە بریتین لە بەرگری کردنێکی ناچاری چینی کرێکار و کارمەند وبێکار و کەم دەرامەتەکان بۆ مانەوە و پاراستنی ژیان لەبەرامبەر هێرشی دڕندانەی کەڵەکەی سەرەتایی سەرمایە لە کوردستان. ئەم پرۆسەیە لەڕێگەی پاوانکردنی کێڵگەکانی نەوت لە لایەن دوو بنەماڵە و کوتلەکانی ناو حزبە دەسەڵاتدارەکان و داماڵینی خەڵکی کرێکار و کەم دەرامەت لەهەرچی پێویستی سەرەتایی ژیان وەک موچە و خزمەتگوزاریە بەڕێوەدەچێ و لەسەر ئەم بنەمایانەش خەریکی سازکردنی کەرتی تایبەت و بەڕێوەبردنی ڕەچەتەی نیولیبرالیزمی بانکی جیهانین. ئەم پرۆسەی کەڵەکەی سەرمایە پەیوەستە بە جێگاو ڕێگای بازاڕی سەرمایەی نەوتی دەسەڵاتدارانی هەرێم و عێراق و بەو دابەشکردنە جیهانیەی بازاڕی سەرمایەوە. هەروەها پەیوەستە بە ململانێی سیاسی یەکێتی و پارتی و کێشمەکێش لەگەڵ بەغداد و جێگاوڕێگای گۆڕان وحزبە ئیسلامیەکان لە ئۆپۆزسیۆن و بەرژەوەندیان لەگەڵ دەسەڵاتدا.

هەربۆیە دەبێ خوێندنەوەیەکی ترمان بۆ ئەم خەباتە جەماوەریە هەبێ کە پشتی بەستبێ بە لێکدانەوەی ئەو پرۆسەیە لە ململانێی چینایەتی و خەباتی چینایەتی لە کوردستان نەک بەو تێگەیشتنە زاڵەی ئۆپۆزسیۆنی بورژوازی کە لە دژایەتی دەسەڵاتێکی گەندەڵگار و پرۆژەی چاکسازی تایبەت بە شێوازی دەسەڵاتداری و دابەشکردنەوەی پۆست و داهاتدا لە نێو حزبە سیاسیەکانی ئێستادا دەیبینێ . ڕاستە ئەم دەورەیە لە کەڵەکەی سەرمایە پیویستی بە هێرشی دڕندانەی یەکێتی و پارتی و حکومەتی هەرێمە بۆ سەر ژیان و ئازادیەکانی خەڵکی کوردستان هەربۆیە خەسڵەتی سیاسی ناڕەزایەتیەکانی خەڵک زاڵە و خواستی ڕوخانی ئەم دەسەڵاتە زەق دەکاتەوە. بەڵام لە نەبونی لێکدانەوەیەکی زانستی و دروستدا بۆ ئاستی توانایی سیاسی و ڕیکخراوی چینی کرێکار و فەرمانبەران و خەڵکی بێکار و ناڕازیدا و ناسینی چۆنیەتی گۆڕانی ئەم دەسەڵاتە و ئامادەکردنی ئامڕازە سیاسی و جەماوەریەکان بۆ گۆڕینی دەسەڵات ئەم خەباتە جەماوەریانە جارێکی تر دەچنەوە ژێر سایەی ململانێی حزبە ئۆپۆزسیۆنەکان لە دەسەڵاتدا بۆ نمونە ئیسلامیەکان و جارێکی تر ئەم خەباتە جەماوەریە توشی نوشست دەبێ . هەربۆیە دوای ئەزمونی دەیەو نیوێک لەم خەباتە جەماوەریە لە جێگای بەتەنیا بەرزکردنەوەی دروشمی “ڕوخان و ڕاماڵین” ،پێویستی بە ناسینی ئەم زەمینە ئابوری و سیاسیانەیە کە هەم ئاستی هێرشەکانی دەسەڵاتدارانی سەرمایە لە کوردستان دیاری دەکا و هەم پێویستیە فەوری و درێژخایەنەکانی مەیدانەکانی خەباتی جەماوەری لە ڕوبەڕوبونەوەی سیاسەت و هەنگاوەکانی دەسەڵاتداراندا دیاری دەکا. ئەم خەباتە جەماوەریە پرۆسەیەک و زنجیرەیەکی بەردەوامە کە پێویستی بەوەیە کە هەنگاوە یەک لەدوای یەکەکانی خۆی دیاری بکا تا بتوانێ ڕوبەڕووی هەموو هەوڵەکان و قۆناغەکانی ئەم فشارەی حکومەتی هەرێم و لایەنەکانی بەشدار لەم ڕوتاندنەوە و هەژارکردنەی خەڵکدا بەشدارن، ببێتەوە. مەیدانی ڕووبەڕووبونەوەی سیاسەتی فرۆشتنی کەرتە حکومیەکان و بێکارکردن و درێژەدان بە بڕینی موچە و خزمەتگوزاریەکان وباجگیری و سەرکوت و چەندین مەیدانی تر ئەمڕۆ پێویستیان بە کۆکردنەوەی دەستە ناڕەزایەتیەکان و هەلسوراوانی کرێکاری و جەماوەری و کۆمۆنیست و چەپ و هەموو هێزێکی ناڕازی ئازادیخوازە کە بتوانین ئەم نەخشە سەراسەریانەیە کە دژی پلانەکانی دەسەڵات و کۆمپانیاکانیان بوەستینەوە. ئەم خەباتە جەماوەریە ئێستا لە سەرەتادایە و پێویستی بە ئامادەکاری سیاسی و جەماوەری و ڕیکخراوەییە و نابێ بە هەڵگرتنی دروشمی “ڕامالینی دەسەڵات” پێمان وابێ کاری ئەم خەباتە جەماوەریە تەواوە و ئەو عەسا سیحریەی ڕوخانی دەسەڵاتمان بەسە تا سەرکەوین.  دیاری کردنی ئەم هەنگاو تاکتیکانەی ئەمڕۆی خەباتی جەماوەری و سیاسی بۆ کرێکاران و توێژە کەم دەرامەتەکان دەتوانێ ستراتیژی بەردەم ئەم بزوتنەوەیە کە خۆی لە کۆتایی هێنان بە دەسەڵاتی یەکێتی و پارتیدا دەبینێتەوە ڕۆشن بکاتەوە و ئەو ئامادەییە سیاسی و ڕیکخراوییانەی ئەم جەماوەرە لەم پرۆسەیەدا بەدەستی دەهێنێ ئاسۆی بەردەم سەرکەوتنی کۆتایی ڕۆشن دەکاتەوە

Add Comment

Click here to post a comment